Sa muling pagdilat ng mga mata
Natagpuan ang sarili sa mundong ayaw
Nag-iisip, nakatingin sa kisameng dilaw
Tinatamad at ayaw gumalaw
Nagulat sa tunog, may mensaheng natanggap
Nag-alangan kung bubuksan o iiwan
Hindi nakatiis, unti-unting tiningnan
Umasang ito'y mula sa isang taong t'wing paggising hinahanap
Pagtingi'y nakaramdam ng pagkabigo
Alam na sa sarili ngunit pilit pa ring niloloko
Sa wakas, pabulong na sinabi sa sarili
Isang paalalang kailangan maalala "Wala na siya"
Nagbihis papunta sa eskwela
Piniling suotin ang asul na kasuotan
Parehong damit sa huling beses na nagkita
Doon sa bilihan malapit sa eskwela
Sumakay ng jeep, dinaanan ang kahabaan ng taft
Hindi nanibago 'pagkat ito ang sinakyan
Patungo sa tagpuan kung sa'n naghintayan, kumain, nagtawanan
Sa parehong lugar kung saan din nagpaalam
Nadaanan ang lugar kung saan nagkikita
Ngumingiti habang nakasimangot ang mga mata
Lumingon palayo upang hindi makita
Muli, sinabi sa sarili "Wala na siya"
Umupo nang tahimik, binuklat ang libro
Nagkukunwaring nakikinig sa guro
Hindi gusto ngunit utak ay nasa ibang mundo
Habang nakatulala sa mga salitang nanlilito
Uwian na at oras na para lumisan
Narinig ang mungkahi ng kaklaseng hinahanap ang kasama
Isang sagot ang binato ng isa pa
"Wala na siya"
Naaalala sa halos lahat ng bagay
Makita, marinig, maramdama'y nagpapaalala
Nahihibang sa kakaisip
Kailangan muling gumising "Wala ka na"